Na zelenoj pijaci u TC „Gintaš“ juče su se grčke jagode prodavale po cijeni od 15 eura za kilogram. Prodavci ističu da interesovanja ima, ali se uglavnom kupuju manje količine, najčešće do pola kilograma.
U ponudi su i borovnice pakovane u korpicama od 250 grama, koje se prodaju po cijeni od pet eura. Kilogram banana košta od jednog do 1,80 eura, dok se jabuke mogu kupiti po cijeni od jednog do 2,50 eura. Japanske jabuke iz uvoza dostižu cijenu od pet eura po kilogramu.
Mandarine se prodaju od 1,50 do 2,50 eura, dok je za kilogram dunja potrebno izdvojiti pet eura. Kivi i nar koštaju po tri eura, koliko i limun.
Kilogram krompira prodaje se za euro, dok je pakovanje od pet kilograma dostupno za 4,50 eura. Crni luk košta 1,50 eura, a bijeli šest eura po kilogramu. Paprike se prodaju po cijeni od dva do 2,50 eura, dok šargarepa košta od 1,50 do dva eura.
Cijene mliječnih proizvoda ostale su nepromijenjene. Mladi sir se prodaje po cijeni od 6,50 eura, dok stari sir košta od osam do devet eura. Kučki sir se cijeni devet eura, a mladi kajmak 14 eura.
Jaja se, u zavisnosti od klase, prodaju po cijeni od 23 do 35 centi po komadu.
U ponudi je i kisjeli kupus po cijeni od tri eura za kilogram, dok glavica svježeg bijelog kupusa košta 80 centi. Kilogram raštana, tikvica i cvekle prodaje se po cijeni od dva eura.
Izvor: Dan
Foto: Tržnice i pijace
